Bizitzaren legea (Xabier Badiola)

 Enbor hil baten barneko lozorro geldoa,

mundura ekarri gintuen gurpil zoroa.

Enbor hil baten barneko lozorro hezean,
hilotz hontaz elika baso gaztea,
haren erraietatik haz zuhaitz lerdena,
haren birikietatik oihu ozenena.

Zaharren ondotik dator gaztea,
hau bizitzaren legea.
Sasi ihartua erretzean
hazten da larre berdea.

Aspaldi sartu zaigu harra gorputzean,
batzuen onerako, askoren kaltean.
Kupida gabe gure barneak erauzten
ginenaren azal huts bihurtu nahiean.

Zaharren ondotik dator gaztea,
hau bizitzaren legea.
Sasi ihartua erretzean,
hazten da larre berdea.